प्रथम सत्र परीक्षा संपली की दिवाळी सुट्टीचे वेध लागतात. त्या सुट्टीच्या आधी हा उपक्रम असतो. आश्विन चांदण्यातील दिवाळी सहभोजन मुलांसाठी सुंदर अनुभव असतो. शेवटच्या पेपरच्या दिवशी संध्याकाळी विद्यार्थी छान नवे कपडे घालून शाळेत येतात. गटागटाने पणत्या रंगवणे, ग्रीटिंग करणे, भेटकार्ड करणे, आकाश कंदील तयार करणे सुरू असते. काही गट खाद्यपदार्थ तयार करण्यासाठी सक्रिय असतात कारण आजचे संध्याकाळचे सहभोजन शाळेतच तयार केले जाते. एकीकडे मुलांसाठी योग्य असा चित्रपट देखील चालू असतो. मुले त्यात रमलेली असतात. चित्रपट संपला की सर्व विद्यार्थी रांगा करून बाहेर पडतात. परिसरातील मोकळ्या रस्त्यांवर अश्विन महिन्यातील आकाशातील चांदण्या बघत, गप्पा मारत फेरफटका होतो. मग सर्वांनी मिळून तयार केलेल्या जेवणावर ताव मारत शिक्षकांच्या पाया पडून, एकमेकांना शुभेच्छा देऊन मुले आनंदात घरी जातात. इतर ठिकाणी साजरी केली जाणारी दिवाळी पार्टी नव्हे तर मातृभाषेतून शिक्षण देणाऱ्या मराठी शाळेतील अश्विन चांदण्यातील दिवाळी सहभोजन आहे. परस्परांविषयी स्नेहभाव वाढवणारा, कलांचा आस्वाद देणारा, रुचीपूर्ण आनंद देणारा एक उत्सवच!